Kushtet e Përdorimit

1. Pranimi i kushteve

Këto kushte rregullojnë përdorimin e platformës Edu+ (edu-plus.al), të ofruar nga Vektor Studio, Tiranë, Shqipëri (“ne”). Duke krijuar një llogari ose duke përdorur platformën, kopshti (“Kopshti”) i pranon këto kushte, së bashku me Politikën e Privatësisë. Personi që regjistron kopshtin deklaron se ka autoritetin ta përfaqësojë atë.

2. Shërbimi

Edu+ është një platformë në internet për kopshtet: grupet dhe edukatoret, profilet dhe dosjet e fëmijëve, pjesëmarrja, detyrat për grupin dhe familjen, formularët digjitalë, takimet, materialet dhe akses për prindërit.

Edu+ është mjet administrativ dhe dokumentimi. Nuk është pajisje mjekësore, nuk jep diagnoza dhe nuk zëvendëson gjykimin profesional të edukatoreve dhe të stafit. Vendimet edukative dhe shëndetësore mbeten përgjegjësi e Kopshtit dhe e profesionistëve të tij.

3. Llogaritë dhe siguria

• Administratori i Kopshtit krijon llogari për edukatoret dhe prindërit, të cilët hyjnë me username dhe kod personal.
• Kopshti është përgjegjës për ruajtjen e konfidencialitetit të fjalëkalimeve dhe kodeve, për dhënien e tyre vetëm personave të duhur, dhe për rigjenerimin ose fshirjen e llogarive kur një edukatore largohet ose një fëmijë largohet nga kopshti.
• Kopshti na njofton menjëherë nëse dyshon për përdorim të paautorizuar të një llogarie.

4. Prova falas dhe abonimi

• Çdo kopsht i ri ka një periudhë prove falas prej 14 ditësh (1 grup, 2 edukatore dhe 20 fëmijë).
• Çdo plan ka kufij për numrin e edukatoreve dhe të fëmijëve (Kopsht i vogël: 6 edukatore dhe 60 fëmijë; Kopsht: 15 edukatore dhe 150 fëmijë; Kopsht+: sipas marrëveshjes). Viti shkollor llogaritet 10 muaj. Kufijtë zbatohen automatikisht nga platforma.
• Planet dhe çmimet e vlefshme publikohen në edu-plus.al. Pagesa bëhet me transfertë bankare ose mënyra të tjera që ju komunikojmë; pas pagesës Kopshti merr një kod aktivizimi që e fut te seksioni “Abonimi”.
• Abonimi nuk rinovohet automatikisht. Para skadimit dërgojmë kujtesa me email.
• Pas skadimit, aksesi në platformë pezullohet derisa të aktivizohet një kod i ri; të dhënat mbeten të ruajtura sipas Politikës së Privatësisë.
• Pagesat e kryera nuk rimbursohen për periudhën e mbetur, përveç kur parashikohet ndryshe me ligj ose me marrëveshje me shkrim.
• Çmimet mund të ndryshojnë për periudhat e ardhshme; ndryshimet njoftohen paraprakisht dhe nuk prekin periudhat e paguara.

5. Përdorimi i lejuar

Një abonim mbulon një kopsht: një subjekt dhe një vend pune. Për disa vendndodhje ose subjekte nevojitet plani Kopsht+ ose një marrëveshje e veçantë. Kopshti angazhohet që:

• të regjistrojë vetëm fëmijët që frekuentojnë atë kopsht dhe edukatoret e tij; nuk lejohet mbajtja e të dhënave të fëmijëve ose edukatoreve të një institucioni tjetër;
• të mos ndajë llogarinë e administratës, kodet e abonimit apo kodet e hyrjes me persona jashtë Kopshtit;
• të fusë në platformë vetëm të dhëna për të cilat ka bazë ligjore (p.sh. kontratë regjistrimi në kopsht dhe/ose pëlqim të prindit/kujdestarit), dhe të informojë prindërit për përdorimin e Edu+;
• të mos ngarkojë përmbajtje të paligjshme, fyese ose që shkel të drejtat e të tjerëve;
• të mos tentojë të anashkalojë masat e sigurisë, të aksesojë të dhënat e institucioneve të tjera, të ngarkojë kod dashakeq ose të mbingarkojë shërbimin;
• të mos e rishesë ose ta vërë platformën në dispozicion të palëve të treta jashtë Kopshtit pa marrëveshje me ne.

Ne mund të verifikojmë përdorimin (p.sh. numrin e llogarive dhe të fëmijëve). Në rast shkeljeje, pasi ta kemi njoftuar Kopshtin, mund të kërkojmë kalimin në planin e duhur, ta pezullojmë llogarinë ose ta ndërpresim shërbimin.

6. Të dhënat e Kopshtit

Të gjitha të dhënat që Kopshti fut në platformë mbeten pronë e Kopshtit. Ne nuk marrim asnjë të drejtë mbi to përveç asaj që nevojitet për të ofruar, mirëmbajtur dhe mbrojtur shërbimin. Kopshti mund të kërkojë në çdo kohë një kopje të të dhënave të tij ose fshirjen e tyre; fshirja e plotë mund të bëhet edhe vetë, nga “⚙️ Llogaria → Fshi kopshtin”. Për të shmangur fshirjen pa dashje, kjo kërkon emrin e kopshtit dhe fjalëkalimin e administratës, dhe kryhet 7 ditë pas kërkesës. Deri atëherë mund të anulohet, dhe administrata njoftohet me email.

7. Marrëveshja e përpunimit të të dhënave (DPA)

Për të dhënat personale që Kopshti fut në platformë, Kopshti është kontrollues dhe Vektor Studio është përpunues, sipas Ligjit nr. 124/2024 “Për mbrojtjen e të dhënave personale”. Ky seksion përbën marrëveshjen e përpunimit mes palëve.

7.1 Objekti

Përpunimi ka për qëllim vetëm ofrimin e platformës Edu+ gjatë kohëzgjatjes së përdorimit. Kategoritë e subjekteve: fëmijët e regjistruar, prindërit/kujdestarët, edukatoret dhe stafi i Kopshtit. Kategoritë e të dhënave: të dhëna identifikuese dhe kontakti, të dhëna për zhvillimin dhe shëndetin (kategori të veçanta), shënime edukative, fotografi, video dhe dokumente.

7.2 Detyrimet tona si përpunues

• I përpunojmë të dhënat vetëm sipas udhëzimeve të dokumentuara të Kopshtit — këto kushte dhe veprimet që Kopshti kryen në platformë — përveç kur ligji na detyron ndryshe (në atë rast e njoftojmë Kopshtin, kur lejohet).
• Personat tanë me akses në të dhëna kanë detyrim konfidencialiteti.
• Zbatojmë masat teknike dhe organizative të përshkruara te Politika e Privatësisë (enkriptim, ndarje mes institucioneve, akses sipas rolit, kopje rezervë të enkriptuara).
• Angazhojmë nënpërpunues vetëm me detyrime mbrojtjeje të njëjta në thelb; lista aktuale është te Politika e Privatësisë. Për çdo nënpërpunues të ri njoftojmë Kopshtin të paktën 30 ditë më parë; Kopshti mund të kundërshtojë dhe, nëse nuk gjendet zgjidhje, të ndërpresë përdorimin.
• E ndihmojmë Kopshtin t'u përgjigjet kërkesave të subjekteve të të dhënave (akses, korrigjim, fshirje, portabilitet) dhe me vlerësimet e ndikimit kur nevojiten.
• Njoftojmë Kopshtin pa vonesë të panevojshme, dhe kur është e mundur brenda 48 orëve, pas marrjes dijeni për një cenim të sigurisë që prek të dhënat e tij, me informacionin e disponueshëm.
• Në përfundim të shërbimit, sipas zgjedhjes së Kopshtit, i kthejmë ose i fshijmë të dhënat; kopjet në backup-et e enkriptuara zhduken brenda 90 ditëve.
• Vëmë në dispozicion informacionin e nevojshëm për të provuar përputhshmërinë dhe bashkëpunojmë me kontrolle të arsyeshme, me njoftim paraprak.

7.3 Detyrimet e Kopshtit si kontrollues

• Siguron bazën ligjore për përpunimin dhe informon subjektet e të dhënave (veçanërisht prindërit).
• Fut vetëm të dhënat e nevojshme për qëllimin e shërbimit të kopshtit dhe i mban ato të sakta.
• Menaxhon aksesin e stafit të vet dhe heq aksesin kur nuk nevojitet më.

8. Disponueshmëria

Bëjmë çdo përpjekje të arsyeshme që platforma të jetë e disponueshme dhe e sigurt, por nuk garantojmë funksionim të pandërprerë ose pa gabime. Mund të ketë ndërprerje për mirëmbajtje, përditësime ose për shkak të ofruesve të infrastrukturës. Ndërprerjet e planifikuara të gjata i njoftojmë paraprakisht kur është e mundur.

9. Pronësia intelektuale

Platforma, kodi, dizajni, emri dhe logoja Edu+ i përkasin Vektor Studio. Kopshti merr një të drejtë përdorimi jo-ekskluzive dhe të pa-transferueshme gjatë abonimit. Formularët dhe raportet e gjeneruara nga Kopshti mund të përdoren lirisht nga Kopshti për punën e tij.

10. Kufizimi i përgjegjësisë

Në masën maksimale të lejuar nga ligji, ne nuk mbajmë përgjegjësi për dëme indirekte, humbje fitimi ose humbje të dhënash të shkaktuara nga përdorimi i gabuar i platformës, nga veprime të Kopshtit ose të përdoruesve të tij, ose nga ngjarje jashtë kontrollit tonë të arsyeshëm. Përgjegjësia jonë e përgjithshme për çdo pretendim kufizohet në shumën e paguar nga Kopshti për shërbimin gjatë 12 muajve para ngjarjes. Këto kufizime nuk zbatohen për dëmet e shkaktuara me dashje ose nga pakujdesi e rëndë, ose kur ligji nuk lejon kufizim.

11. Pezullimi dhe përfundimi

• Kopshti mund të ndalojë përdorimin në çdo kohë dhe të fshijë të dhënat e tij.
• Ne mund të pezullojmë ose mbyllim një llogari në rast shkeljeje të rëndë të këtyre kushteve, rreziku për sigurinë e të tjerëve ose mospagese, pas njoftimit kur është e mundur.
• Pas përfundimit, të dhënat trajtohen sipas pikës 7.2 dhe Politikës së Privatësisë.

12. Ndryshimet e kushteve

Mund t'i përditësojmë këto kushte. Ndryshimet e rëndësishme njoftohen me email ose brenda platformës të paktën 30 ditë përpara se të hyjnë në fuqi. Vazhdimi i përdorimit pas kësaj date nënkupton pranimin e tyre; nëse nuk jeni dakord, mund të ndërprisni përdorimin.

13. Ligji i zbatueshëm

Këto kushte rregullohen nga ligjet e Republikës së Shqipërisë. Palët përpiqen t'i zgjidhin mosmarrëveshjet me mirëkuptim; në të kundërt, kompetente janë gjykatat e Tiranës.

14. Kontakti

Vektor Studio — Tiranë, Shqipëri
Email: vektortechstudio@gmail.com
Telefon / WhatsApp: +355 68 200 5440